Layihələr

Femida TV

Femida Könüllüləri Təşkilatı tərəfindən Femida TV onlayn platforma təsis edilib. Femida TV-nin məqsədi hüquqi maarifləndirmə işinin aparılması, gənc hüquqşünasların, o cümlədən digər gənclərin hüquq sahəsində çalışan mütəxəssislərlə kommunikasiyasının möhkəmləndirilməsi, onların bu sahədə peşəkar fəaliyyətə marağının daha da artırılmasıdır. Bu çərçivədə Femida TV tərəfindən #hakim, #vəkil və digər sahədə fəaliyyət göstərən hüquqşünasların iştirakı ilə podkast və digər xarakterli müxtəlif videoçarxların yayımlanması nəzərdə tutulur.

"DİVAN" Milli Məhkəmə Simulyasiyası

Azərbaycan Respublikasının Gənclər və İdman Nazirliyi tərəfindən gənclər təşkilatlarının fəaliyyətinin dəstəklənməsi məqsədilə 2024-cü il üzrə elan edilmiş qrant müsabiqəsi çərçivəsində, Azərbaycan Respublikasının Ali Məhkəməsi, Məhkəmə-Hüquq Şurası və Vəkillər Kollegiyasının tərəfdaşlığı ilə “Femida Könüllüləri” Təşkilatı tərəfindən təşkil edilən “DİVAN” – Milli Məhkəmə Simulyasiyası hüquqşünas gənclərin nəzəri və praktiki biliklərini artırmaq, onların natiqlik, detallarla işləmə, sübutetmə və inandırma bacarıqlarını inkişaf etdirmək məqsədilə təşkil olunan müsabiqə platformasıdır. Layihənin əsas məqsədi gənc hüquqşünasların bilik və bacarıqlarını genişləndirmək, onların peşəkar hüquq mütəxəssisi kimi formalaşmasına töhfə verməkdir. Layihə nəticəsində iştirakçılar Azərbaycan məhkəmə sisteminin, xüsusən də birinci instansiya məhkəməsinə müraciət qaydaları, məhkəmə prosesinin gedişatı və iddianın qəbuledilənlik meyarları ilə yaxından tanış olmaq imkanı əldə edirlər.

Dəyirmi Masa

Femida Könüllüləri üçün "Dəyirmi Masa" layihəsi elan edilir! "Dəyirmi Masa" layihəsi çərçivəsində Femida Könüllüləri müvafiq mövzular ətrafında müxtəlif ölkələrin qanunvericiliklərini, presedent hüquqlarını və beynəlxalq konvensiyaları müqayisə edərək real kazuslara tətbiq etmə şansı əldə edəcəklər! Müzakirələr zamanı könüllülər fərqli ölkə qanunvericilikləri ilə yanaşı Azərbaycan Respublikası Konstitusiya Məhkəməsi və Ali Məhkəməsinin plenum qərarlarını peşəkar hüquqşünaslarla birgə diskussiya edə biləcəklər.

I Daxili Debat Müsabiqəsi

Femida Könüllüləri üçün I Daxili Debat Müsabiqəsi elan edilir! "Femida Könüllüləri” Təşkilatı və Debat Vətəndaş Cəmiyyətinin (Vətəndaş Cəmiyyətində Debat IB) əməkdaşlığı ilə hüquqşünasların asudə vaxtlarının səmərəli dəyərləndirilməsi, onlarda natiqlik, tənqidi düşüncə və eyni zamanda araşdırma qabiliyyətinin inkişaf etdirilməsi məqsədilə Daxili Debat Müsabiqələrinin həyata keçirilməsi nəzərdə tutulur.

"Gündəlik Hüquq" layihəsi

"Gündəlik Hüquq" müvafiq hüquq normalarının, Azərbaycan Respublikasının Ali Məhkəməsi və Konstitusiya Məhkəməsinin qərarlarının, o cümlədən #aktual olan hüquqi məsələlərin ictimaiyyətə çatdırılması nəzərdə tutan layihədir. "Gündəlik Hüquq" hüquqşünas tələbələrin hüquqi savadlılığını artırmaq, qeyri-hüquqşünasları maarifləndirmək və onların hüquq düşüncəsini inkişaf etdirmək məqsədilə həyata keçirilən layihədir. “Gündəlik Hüquq” hüquq sahəsində əhəmiyyət kəsb edən və çox zaman insanların səhv saldığı hüquqi məslələrin aydınlaşdırılmasına yönəlir. Layihə hüquqi məsələlərin geniş bir auditoriyaya daha dərinlikli izahını təmin edərək cəmiyyətdə hüququn mühüm bir hissəsinin sürətlə və dərindən anlaşılmasına kömək etmək məqsədi daşıyır.

"ArbiTrain" seriya təlimləri

"Femida Könüllüləri" Təşkilatı tərəfindən gənc hüquqşünaslar arasında ölkədə yeni növ hüquq peşələrinin təbliği məqsədilə təşkil edilmiş "ArbiTrain" layihəsi start götürür. Layihə çərçivəsində Femida könüllüləri arbitraj hüququ sahəsində ilkin anlayış və prinsiplər haqqında məlumat öyrənəcək, "Arbitraj haqqında" Azərbaycan Respublikasının Qanunu ilə yaxından tanış olacaqlar. Bununla yanaşı, könüllülər həm cari arbitraj prosesləri, həm də gələcək ixtisas seçimi ilə bağlı məlumatlar əldəetmə şansı qazanacaqlar.

"Legal MeetUp" Platforması

“Femida Könüllüləri” Təşkilatı, könüllülərin hüquqi-nəzəri biliklərinin artırılması və onların peşəkarların təcrübələrindən faydalanması məqsədilə “Legal Meetup” platformasına start verir.“Legal Meetup” layihəsi çərçivəsində, Femida Könüllüləri mütəmadi olaraq, hüquq sahəsində ixtisaslaşmış hüquqşünaslarla görüşlər keçirəcək, onların nəzəri bilikləri ilə yanaşı peşəkar təcrübəsi ilə də yaxından tanış olma şansı əldə edəcəklər.

"Legal Ring" intellektual yarışması

“Femida Könüllüləri” Təşkilatı tərəfindən könüllülərin asudə vaxtlarının səmərəli təşkili, onların hüquqi bilikləri və dünyagörüşlərinin artırılması məqsədilə “Legal-Rinq” intellektual yarışması həyata keçirilir.