Təlim zamanı iştirakçılar mülkiyyət hüququnun hüquq sistemində tutduğu yer və əhəmiyyəti, bu hüququn əsas anlayışları və prinsipial xüsusiyyətləri barədə ətraflı məlumatlandırılıblar. Təqdimatda ilk olaraq mülkiyyət hüququnun anlayışı və hüquqi mahiyyəti izah olunub, bu hüququn Konstitusiyada və Mülki Məcəllədə necə tənzimləndiyi barədə danışılıb. Nazənin Hüseynova mülkiyyət hüququnun əsas elementlərini – sahiblik, istifadə və sərəncam hüquqlarını təhlil edərək onların praktikada necə reallaşdığını konkret nümunələrlə izah edib. Bundan əlavə  mülkiyyət hüququnun formaları — dövlət, bələdiyyə və xüsusi mülkiyyət formaları fərqləndirilib, hər bir mülkiyyət formasının hüquqi rejimi və tətbiq sahələri haqqında ətraflı məlumat verilib. Təlimdə həmçinin mülkiyyət hüququnun subyektləri və obyektləri anlayışı da xüsusi diqqət mərkəzində olub. Fiziki və hüquqi şəxslərin, dövlət və bələdiyyə orqanlarının bu hüquqa malik olması və bu hüquqların reallaşdırılması mexanizmləri müzakirə edilib.

Sonda Femida Könüllülərini maraqlandıran suallar cavablandırılıb.